سلسلة رحلة الإبتعاث إلى المملكة المتحدة : : اهم المهام بعد الوصول إلى بريطانيا

 السلام عليكم ورحمة الله وبركاته 

اسعد الله مساؤكم / صباحكم 

بعد ماخلصنا اهم مرحلتين في الابتعاث , التسجيل في الجامعة , ضبطنا الفيز وحجوزات الطيران والسكن المؤقت 

هالتدوينة بتكون عن مهام اول اسبوع بعد الوصول ,  التحضيرات للسكن الدائم والأمور المتعلقة فيها من الكهرباء والموية والتسوق للأغراض الاساسية  .. 

أولاً: مهــام أول اسبوع 

فيه نقطة مهمة حابة انوه عليها الأفضل تأخذون معاكم كاش من المطار بالسعودية فيه صرافات للعملات ع حسب البنك اسهل من انكم تصرفون من الصرافات البريطانية لأنهم يأخذون سعر الصرف ورسوم.. تحتاجونها بالمصاريف اليومية زي السوبرماركت, الصيدلية والمطاعم..

1. فتح ملف في سفير 

بعد سفير 2 صارت الأمور اسهل بكثير فقط تفتحون الملف وتلقون فيها كل المعلومات وبعدها ترفعون بعض المستندات ومنها اختام الدخول واضافة المرافقين ( مهم تسوونها اول ماتوصلون عشان تحتاجون ضمان للبنك وضمان لما تستأجرون الشقة الدائمة ولأن فتح الملف ياخذ كم يوم للموافقة على المرافقين وقبول الملف)..

2. استلام بطاقة الإقامة 

هنا فقط للي فيزتهم التاير 4 أكثر من ستة اشهر راح تلقون فيه ورقة توصل مع الجواز يكون فيها عنوان البريد اللي بتستلمون منها البطاقة.

3. التسجيل في الشرطة 

ضروري التسجيل في الشرطة خلال اسبوع من تاريخ الدخول , الأهم التسجيل بالموعد جتى لو كان الموعد بعيد , وهذا الرابط فيه شرح لطريفة التقديم ..  هنـــا

4. الشريحة البريطانية

بالنسبة لي اخذتها من المطار (من شركة THREE) اشتراك مفتوح للنت والمكالمات والرسايل 35 باوند بالشهر راح تحتاجونها كثيربالبداية عشان التنقل بقوقل ماب , وبعدها حولت لشركة اخرى افضل بالتغطية وارخص (VOXI-VODAFON) اشتراكها 10 باوند اشتراك مفتوح لبرامج التواصل الأجتماعي + 8 قيقا بالاضافة الى الاتصال والرسائل لامحدودة .. نصيحة لكم لاتأخذون عقد مع شركة اتصال لأنكم راح تلزمون فيه لسنة واحياناً تكون التغطية في منطقة السكن ضعيفة ..

5. البطاقة البنكية

بالنسبة للبنوك هنا تتطلب تعريف من الجامعة والملحقية لذلك الناس اللي يجون قبل يحتاجون بطاقة يمشون اوضاعهم فيها انا صراحة كانت معاي بطاقة المسافر مشيت نفسي فيها , لكن بعدين عرفت انه فيه بنوك رقمية تقدرون تطلعونها وتوصلكم باقل من اسبوع , فتقدرون تحولون لها عن طريق STC PAY اول عن طريق تحويل من احد الموجودين تحولون لهم بالسعودي ويعطونكم باوند اشوفها اسهل ..

تقريباً هذه اهم الأمور اللي تسوونها بأول اسبوع من وصولكم 

ثانيـاً: تحضيرات السكن الدائم

1. اول شيء يحتاج تحددون مكان السكن ع حسب ظروفكم لأن تختلف اللي عندهم اطفال او لا , مكان الدراسة هل يحتاج تروحون يومياً او لا , تحبون المنطقة مخدومة او عادي مايهم عشان معاكم سيارة .. فأنا حددت اولوياتي وصرت ابحث في برنامج الرايت موف طبعـاً باستشارة الموجودين هنا من  ناحية المكاتب وافضل العمائر ..

(نقطة مهمة لكم اول ماتستلمون الشقة تحرصون ع تصوير كل شيء فيها وتحتفظون فيها عشان لما تسلمون الشقة مايحسبون لكم اشياء كانت موجودة قبل + اي شيء خربان تلاحظونه من اول اسبوع ترسلون ايميل للمكتب ) 

2. بعد ماتستأجرون وتخلصون اموركم يحتاج تأخذون اهم الأغراض الأساسية (المفارش, اغراض المطبخ الأساسية) في محلات كثيرة ممكن تفيدكم (,  B&M home, premark, Wilko ) بالنسبة لي لقيت جودتها افضل وارخص من ايكيا لأن اول ماجيت اشتريت منهم خصوصاً المفارش والاغطية وحسيت الجودة مو مره مقارنة بالأشياء اللي اخذتها من بري مارك وويلكو فانتم شوفوا اللي يريحكم من هالناحية ..

3. بالنسبة لشركات الكهرباء والموية جربوا تشوفن موقع Switch راح يعطيكم ارخص الشركات وضروري تنتبهون لنقطة تسعيرة الليل والنهار وشوفوا ايش استهلاككم اكثر وخوذوا التسعيرة الأرخص هالنقطة ماكنت اعرفها قبل لكن لما فهمتها جبت ورقة وقلم وسجلت تسعيرات كل شركة لليل والنهار ومنها حددت الشركة الأرخص بالنسبة لي ومره ارتحت , بالنسبة للموية في مدينة شيفيلد كان فقط فيه شركة واحدة .. (أحب انوه انه لازم تأخذون القراءات اول مره من المكتب وتدخلونها لما تسجلون مع الشركة وتحتفظون بالورقة ويصير كل شهر تدخلون القرءات عشان يحسبون لكم الاستخدام الحقيقي مو المتوقع لأن ممكن يغرونكم انهم ياخذون سعر بسيط بعيدن لما تسكرون العقد يجبرونكم تدفعون مبلغ وقدره عشان استخدامكم الفعلي لذلك ضروري تنتبهون لنقطة قراءات الكهرباء والموية )

4. الاعفاء الضريبي طبعاَ لأننا طلاب يصير لنا اعفاء عن ضريبة السكن لكن نقطة مهمة بالنسبة للي فيزهم 6 اشهر يمكن ماتشملهم وكثير اعرفهم خلوهم يدفعونها لكن بالنسبة لي أنا رفعت قبولي الماستر مع تعريف اللغة والحمدلله مادفعت شيء في موقع سعوديون في شيفيلد حاطين شرح لطريقة رفع الاعفاء تلقونها هنـــا 

تقريباً غطيت اهم الأشياء ولو فيه اشياء تذكرتها برجع اضيفها 

ان شاء الله اكون غطيت كافة الجوانب للإبتعاث والصراحة كتبت الاشياء اللي واجهتني انا لكن فيه كثير امور مااكون غطيتها زي مدارس الاطفال والحضانة وهذي الأمور لأن ماعندي اي تجربة فيها لكن أي شيء تبغونه تلقونه في مدونة سعوديون في شيفيلد 

بالتوفيق جميعاً وتمنياتي لكم برحلة ابتعاث موفقة 

لاتنسوني ووالديّ من دعواتكم