سلسلة رحلة الإبتعاث إلى المملكة المتحدة : ( كيفية التقديم على الجامعات ؟ )



السلام عليكم ورحمة الله وبركاتة 

اسعد الله مساؤكم/ صباحكم بكل خير 

راح ابدأ سلسة جديدة اتكلم فيه عن رحلة الإبتعاث من الألف إلى اليـاء 
ايش الخطوات والأمور اللي يحتاج نجهزها ونرتبها 
وبإذن الله راح ابدأ بأول الخطوات وهي 

( التقديم على الجامعات ) 




كثير يلجأ لمكاتب تسجلهم والأمر مايحتاج اي شيء وابسط منه مافيه وبالعكس العملية ممتعة لكن محتاجة صبر وتروّي


اول خطوة: 

 انك تختبر الايلتس ويُفضل  انكم تختارون اختبار الـ UKVI IELTS
هو نفسه اختبار الايلتس الأكاديمي العادي لكن الفرق انه في كاميرا فيديو تصور وقت الإختبار طبعاَ هالاختبار
متوفر فقط في ( الرياض , جدة , الدمام ) 
طبعاّ لييش مهم تختبرونه لأنه كذا ولا كذا تحتاجون هالنوع للفيزا فاختصروا ع انفسكم واختبروا اختبار واحد تقدرون تقدمون عليه بكذا شيء

وانا لي تدوينة عن التجهيز لهالاختبار ممكن تساعدكم 






ثاني خطوة :

 تبحث في موقع سفير الجامعات 

 ( تدخل اسم الدولة , التخصص , المرحلة الدراسية )

راح تطلع لك قائمة بالجامعات ابدأ ادخلها وحدة وحدة 

وجيب ورقة وقلم وابدأ سجل اسم الجامعة وايش شروطها المهمة 

ثالث خطوة :

 قد تكون غير ضرورية للبعض لكن اشوفها مهمة  وتعطيك فكرة مبسطة وتساعدك بأختيار الجامعة بعدين 
تسأل الدكاترة  اللي حولك عن الجامعات وبأيش ينصحونك 


رابع خطوة :

تبدأ تسجل بالجامعات وهنـا تحتاج تجهز كذا ملف عشان ترفقهم اثناء التسجيل 
طبعاً منها الاشياء الأساسية :
(كلهم سويت لهم سكان من برنامج بالجوال اسمه Cam Scan وحولتهم إلى PDF )
- صورة من الجواز
- وثيقة التخرج + السجل الأكاديمي 
( تحتاج ترجمة اذا كانت بالعربي )

- شهادة اختبار الايلتس 

 ( مو شرط تكونون جايبين نفس الدرجة المطلوبة الأهم انها تكون فوق 5 وبعض التخصصات تقبل 4.5 )
-صورة من الضمان المالي 

طبعاً قد تكون احجامهم كبيرة لذلك تحتاج موقع  لتصغير الحجم 

ملفات قد تحتاج تغيير من جامعة لأخرى :

- توصيات من دكاترة سبق ودرسوك
 ( عددها يختلف من جامعة لأخرى لكن غالباَ من 2-4 واحرصوا انها تحتوي على شعار المكان اللي يشتغل فيه سواء جامعة او مستشفى ويكون فيها تاريخ ) 

-  personal statement = statement of purpose = خطاب الغرض من الدراسة
كلهم نفس الشيء لكن قد يختلف المسمى هو انك تكتب حوالي 300 كلمة عن نفسك ودراستك وليش تبغى تدرس هالتخصص وفيه نقطة انه الجامعة تكتب لك بعض النقاط والاسئلة اللي تفضل تواجدها في ورقتك فأحرص انك تشملها وتجاوبها 
شوف نماذج من الانترنت وحاول تفهم الكونسبت بعدين اكتب وحدة خاصة فيك وبعدها استعين بموقع يصحح لك ويعيد صاغتها بشكل كويس  
ممكن تستفيدون من هالموقع 
( لاتخلون الموقع يكتبون لكم ع كيفهم لأن بيكتبون لكم مثل غيركم احرصوا انكم انتم تكتبون لهم وهم يصححون او انكم تكتبون النقاط اللي ودكم تنكتب ضروري لمستكم ) 

- Portfolio 
( ملف يحتوي ع اشياء انت اشتغلتها وتكون لها علاقة بالتخصص اللي انت مقدم عليه مثلاً حالات اشتغلتها هو مو ضروري لكن يبين رغبتك واهتمامك بالتخصص وقد يكون نقطة تميزك عن غيرك )



تقريباُ هذه اهم الاشياء اللي اتذكرها , طبعاً اول جامعة قدمت عليها اخذت ثلاث ايام او اكثر  وانا اسجل فيه لأن كنت كل مره اكتشف متطلب  جديد مو جاهز عندي فاروح اضبط لذلك انتم من البداية رتبوها في ملف عندكم عشان تتسهل عليكم 😊

طبعاً بعد ماقدمنا ايش الخطوة الجاية ؟ 


الانتظار لين الرد ولاتستعجل ممكن يردون عليك بثلاثة ايام ممكن باسبوع ممكن بشهر وممكن بخمسة اشهر 

طبعاً الرد بيكون ثلاث احتمالات :

1. الرفض وعادي لاتتحطم عادة يكون عشان درجة الايلتس 
( انا حصلت لي انه انرفضت من جامعة بعدها بدقيقتين او اقل وصلني ايميل قبول من جامعة ثانية  😍)
2. قبول غير مشروط يعني انت استوفيت كل الشروط وهذا قبولك النهائي 
3. قبول مشروط وغالباً يكون بسبب درجة الأيلتس وهنا يكون امامك خيارين : 
أ. اما انك تختبر الأيلتس وتجيب الدرجة المطلوبة بالضبط 
ب . تلتحق في برنامج لغة اكاديمي (pre-sessional course )  على حسب درجتك 
 وباجتيازك لهالبرنامج مايحتاج تختبر ايلتس 

فيه تفصيل لازم اذكره هنـا وبتلكم عن جامعة شيفيلد لأن كل جامعة لها انظمتها 

هم اربعة اترام 
الترم الاول يبدأ في سبتمبر 
الترم الثاني في يناير
الترم الثالث في ابريل 
الترم الرابع الصيفي ( مدته عشرة اسابيع )
دراسة اول ثلاث اترام لاتعادل درجة الايلتس ضروري تأخذون معاه الكورس الصيفي 
وممكن تبدأ من الترم الثاني او الثالث او تكتفي فقط بالصيفي لو كانت درجتك الأيلتس ناقصة درجة وحده عن المطلوبة 
بالنسبة للناس اللي جايبين قبول غير مشروط او اقل بنصف درجة ممكن يلتحقون بالبرنامج الصيفي 6 او 4 اسابيع 

> يارب شرحي لهالنقطة بالذات واضح لأنها اشياء مهمة جداً


تجربة أمل الغامدي في كورس اللغة الأكاديمية 
هنــا

نصيحتي : اللي يقدر يأخذ كل الاترام الأربعة لايتردد لأن صراحة احسها جداً مفيدة لأن الترم الصيفي لوحدة غير كافي لتطوير اللغة 
هو فقط منفذ لعبور عتبة درجة الايلتس 🌟

( ملاحظة في جامعات ماتسجل البرسشنال الا بقبول ماجستير او دكتوراة  مثل جامعة شيفيلد وفيه بعض الجامعات تقبل بدون ) 


تقريباُ هذه اهم الأشياء فيما يخص التسجيل وإن شاء الله راح اكمل بقية الخطوات في الأيام الجاية لكل خطوة في تدوينة منفصلة


وبالنسبة لأي شخص راح يجي لشيفيلد هذا موقع خاص من النادي السعودي كاتبين فيه اغلب التفاصيل ماشاء الله راح يفيدكم كثير
 الله يجعله في موازين حسناتهم 


بالتوفيق جميعاً 
دعواتكم لوالدي بالرحمة والمغفرة ولوالدتي بدوام الصحة والعافية 💓

سبب كتابتي لهالسلسلة اختصار عناء الوقت والبحث عن كل هالمعلومات , وزي مابيوم كنت محتاجة لهالمعلومات ولقيت من ييرشدني لها جاء اليوم اللي أنا اسوي نفس ماسووا لي الأشخاص اللي ساعدوني ويارب يكون اجر هالتدوينات عني وعنهم 🙏

تعليقات

المشاركات الشائعة من هذه المدونة

تجربتي في اختبار الأيلتس واهم المصادر المساعدة