تجربتي في اختبار ( قدرات الجامعيين ) واختبار (كفايات اللغة الانجليزية )

السلام عليكم ورحمة الله وبركاته 

مساؤكم وصباحكم خير 

اولاً اعتذر للتأخير بالنسبة للناس اللي صوتوا للتغريدة اللي كتبتها بشهر رمضان لأني انشغلت الايام اللي فاتت وماكنت بمود الكتابة 

راح اتكلم اليوم عن تجربتي لأختبارين يسوونها قياس 

بالنسبة لأختبار (قدرات الجامعيين ) بس كذا اختبرته لقيت نفسي فاضية وقلت اختبره ممكن يطلبونه عشان ابتعاث او وظيفة 

اما اختبار(كفايات اللغة الانجليزية ) فهو كان مطلوب عشان التقديم لوظيفة إعادة عشان كذا اختبرته 

اولاً راح اذكر تجربتي بالنسبة لقدرات الجامعيين

 يتكون الاختبار من خمسة أقسام: - لفظي. - كمّي. - التفكير الناقد. - الأشكال. - المنطق.أسئلة الاختبار موزّعة على ستة أقسام، ولكل قسم (25) دقيقة ومدة الاختبار الفعلية ساعتان ونصف، تضاف إليها ساعة واحدة تقريباً لإجراءات الدخول لمقر الاختبار والإرشادات.

هذا الكلام من نفس الموقع لكن انا اذكر كان الاختبار خمسة اقسام  متأكده,  ومدة الإختبار اقل إذا ماكنت غلطانه (= 

الخمسة اقسام عبارة عن :

اول ثلاثة اقسام كلها فييها اسئلة منوعة مابين( مسائل حسابية - قطعة وعليها اسئلة - مرادفات يسألون عن معنى كلمة اوايجاد علاقة بين المفردات

القسم الرابع عبارة عن :

اشكال وتوجد الشكل المكمل طبعاً راح يكون نتيجة تفكير منطقي وفيه اسئلة عامة مثلاَ  لو كنت مدير شركة ويذكرون لك موقف ايش التصرف اللي تسويه

القسم الأخير عبارة عن :

اسئلة بحثية يعني يشرح بحث معين او تجربة معينة سووها على ناس مع نتائج البحث وبعدها يسألك اسئلة عن هالبحث مثلاً انا جابوا لي نموذج انهم سووا بحث ع مجموعة طلاب وطالبات ابتدائي (صفوف دنيا وصفوف عليا )ومتوسط  ناسية البحث عن ايش بالضبط لكن اختبروهم عن شيئ معين وثقفوهم بمحاضرات وفيديوهات ومنشورات ونتيجة الاستجابة لكل اختبار 

الاسئلة كانت مثلاً ليش المجموعة الفلانية تأثروا بالاختبار الفلاني اكثر او مثلاً ليش البنات تأثروا اكثر من الاولاد بالاختبار الفلاني وهكذا 

الحين نجي لأهم جزء وهو انه كيف اذاكر لهالاختبار : 

طبعاً انا في البداية تخبطت كثير دورت نماذج بقوقل لكن للأسف كلها خاصة بأختبار قدرات الثانوي , بعدين حملت تطبيق مسك ايضاً نفس المشكله وبعدين صرت من كثر التشتت وفقدان الأمل طنشت لين قبل الاختبار بيوم انا وصديقتي جينا بنذاكر وتذكرت كلام وحده تقول انو فيه برنامج تهيئة بنفس موقع قياس ورحنا فتحناه وتدربنا صراحه هو اكثر شيئ فادني صح انه ماجاني مثله نصاً لكن عرفت احل المسائل خصوصاً اني تقريباً ناسية كل شيء بعد انقطاع ست سنوات عن الرياضيات ووقتها كان ع بالي الأختبار بس جزء كمي ولفظي يعني مسائل ومرادفات 

المهم خلصنا برنامج التهيئة  وتوكلنا على الله واختبرنا 

بوقت الاختبار يعطونك زي اللوح تكتب عليه ملاحظاتك وحساباتك وللأمانة انا كنت صدق احسب المسائل واطلع النتيجة واختار الأجابة يعني بذمة وضمير كنت احل (= 

صح صدمتني بعض الاسئلة حقت الابحاث والمنطق لكن حبيتها صراحة 

لما طلعت من الإختبار احس اني مصدومة واقول لصديقتي انو ماامداني احسب لبعض الاسئلة قالت لي من جدك قاعدة تحسبين انا اختار الإجابة اللي احسها صح 

المهم لما جيت البيت مدري وش خلاني ابحث بتويتر فجأة لقييت رابط قناة تليقرام خاصة بالقدرات , ولما فتحتها لقيت مستند فتحته الا تجميع اسئلة فيه كثير اسئلة جتني يأني انغبنت غبنه انقهرت من قلب 

انا كان اختباري يوم الثلاثاء , طبعاً وانا بالقروب فتحته يوم الخميس الا فيه مجموعة يقولون انه طلعت النتائج وصراحة انصدمت بدرجتي كانت جداً جميلة مع اني مااحس اني ذاكرت كويس او حليت كويس والصراحه بعدها طمعت قلت ودي اعيده اجيب اكثر

بالمناسبة كنت خايفه من الجزء الكمي بسبب انقطاعي عن الرياضيات والصدفه جبت فيه اعلى من اللفظي  (= 

نجي لثاني إختبارستيب ( كفايات اللغة الأنجليزية) 

 الصراحة هالأختبار مااحب اتذكره لأنه اول اختبار دخلته بدون مذاكرة يعني ع الاقل القدرات تدربت شوي عليه 

لأن لما طلع خبر الوظائف ترددت اقدم عليها او لا ولما قررت اقدم ماقدرت القى وقت مناسب الا بعد ثلاث ايام الباقي كلها مااقدر لأنه صادف سفرتي لمؤتمر مكة فتوكلت على الله وسجلت له وكان بالقصيم بعد لأن مالقيت اي موعد في حائل 

اليوم الأول دورت تجميعات وقعدت اشوف ايش هالإختبار لأني اول مره اسمع فيه >>>> تعلمت من الخطأ الأول 

ثاني يوم يادوب قدرت اقرأ كم كلمة لان وقتها كان عندي دوام الصباح والعصرلين المغرب كان عندي دورة محادثات كنت مسجلة فيها وصادف قبل اختباري بيوم تبع الستيب , اختبار الدورة يعني صدق وقتها مدري وش الحق 

دخلت الإختبار هو كان عبارة عن ثلاثة اقسام :

الأول : (اللسننق)عن محادثات تستمعون لها وعليها اسئلة كان جداً بسيط وسهل

الثاني : ( الريدنق) عبارة عن قطع وعليها اسئلة يمكن تقريباً 13 قطعة تتراوح مابين الطويلة الى القصيرة وكان جداً حلو وواضح

الثالث: ( قرامرر) الصراحة اكثر جزء خبصت فيه لأني الصراحة انا مو مره بالقرامر اتوقع هو اكثر قسم يمكن حوالي خمسين سؤال اذا ماني غلطانه وطبعاً تتدرج فيه مابين السهل والصعب اغلبها قرامر ايام الثانوي 

طلعت من الأختبار كانت مشاعري ملخبطة لكن حسيت انه شيء واجب عليه وخلصته زعلت شوي من اخر قسم لأني ماأديت فيه بالشكل الي يرضيني لأن الصراحة احس كان لازمني اذاكر له شوي واسوي رفرفش للقواعد لكن للأسف الظروف كانت ضدي 

درجتي مش بطالة بالعكس حلوه ع التخبيص اللي خبصته لكن كنت اطمح لأعلى منها , فيه فرق بين نتائج قدرات الجامعيين وكفايات الانجليزي انو في قدرات الجامعيين حاطين نتيجة الجزء الكمي والجزء اللفظي وبعدين النتيجة النهائية  , اما الكفايات فقط درجة وحده حسيت انو المفروض يكتبون نتيجة كل قسم بعدين يطلعون المتوسط عشان الواحد يعرف وين نقاط ضعفه بالضبط يعني انا صح خبصت باخر قسم لكن كان ودي اعرف بالضبط كم درجاتي لكل قسم 

وبس هذي تجربتي البسيطة في كل الأختبارين اتمنى انها تفيدكم وتأخذون فكرة بسيطة عنهم

بالتوفيق لكم جميعاً

ودعواتكم لوالدي بالرحمة والمغفرة